Konungur ljónanna

HAKUNA MATATA!

Leikfélag Menntaskólans á Akureyri færir ykkur söng- og dansleikinn Konung ljónanna, sem byggður er á samnefndri kvikmynd frá árinu 1994.

Aðalpersónan í söngleiknum er Simbi, fjörugur ljónsungi sem einn daginn á að taka við hlutverki föður síns sem konungur ljónanna.
En valdagræðgi föðurbróður hans veldur því að Simbi hrökklast burt frá heimaslóðunum, tekur upp kæruleysislegan lífsstíl og gleymir framtíðarhlutverki sínu.

Þessi sýning mun ná til allra aldurshópa enda er þetta saga og tónlist sem flestir þekkja.

Leikfélag Menntaskólans á Akureyri hefur undanfarin ár sett upp stórar leiksýningar sem hafa slegið hvert aðsóknarmetið á fætur öðru.
Þetta er ein stærsta uppsetning leikfélagsins frá upphafi.
Föngulegur hópur menntskælinga hefur lagt allt sitt í að gera sýninguna að veruleika.

Leikstjóri er Vala Fannell en hún kemur alla leið frá London til að stjórna uppsetningu á þessu skemmtilega verki.
Sýningin einkennist af söng og dansi ásamt mikilli ástríðu og leikgleði.

 Þetta er sýning sem enginn ætti að láta framhjá sér fara, hlökkum til að sjá þig í Samkomuhúsinu.