Björgvin 60 ára afmælistónleikar

Ákveðið hefur verið, í samstarfi við Akureyrarstofu að fara með 60 ára afmælistónleika Björgvins Halldórssonar til Akureyrar í ágúst. Tónleikarnir verða haldnir á Akureyrarvöku sem er árleg bæjarhátíð á Akureyri í tilefni afmæli bæjarins.

Dagskrá hátíðarinnar er fjölbreytt og glæsileg en afmælistónleikar Björgvins verða einn af hápunktum hennar. Eins og kunnugt er slógu tónleikarnir rækilega í gegn í Reykjavík í apríl síðastliðnum þegar þrennir tónleikar seldust upp á augabragði í Háskólabíói og færri komust að en vildu.

Afmælistónleikar Björgvins í Hofi þann 27. ágúst nk. verða eftir sem áður mikil tónlistarveisla, en á persónulegum nótum og ætti enginn lagviss maður að láta sig vanta á herlegheitin. Þar verður rifjaður upp einstakur ferill Björgvins í rúm 40 ár, allt frá því hann var kosinn poppstjarna ársins árið 1969 til dagsins í dag, með viðkomu hjá HLH, Brimkló, Lónlí Blu Boys, Eurovision og Hjartagosunum og jöfnum höndum sungin Íslandslög, rokklög, ballöður af dýrari tegundinni og kántrí.

Staðfestir gestir í afmælinu eru: Eyjólfur Kristjánsson, Jóhanna Guðrún og Krummi. Fastlega má búast við því að fleiri gestir bætist í fögnuðinn áður en yfir lýkur.

Hljómsveitin er óbreytt og valinn maður í hverju rúmi:

Gítar: Jón Elfar Hafsteinsson
Gítar og steel: Sigurgeir Sigmundsson
Gítar og raddir: Eyjólfur Kristjánsson
Hljómborð og raddir: Þórir Úlfarsson
Bassi og raddir: Friðrik Sturluson
Slagverk og raddir: Hannes Friðbjörnsson
Trommur: Jóhann Hjörleifsson
Hammond: Þórir Baldursson