Edda Björg leikur í Vorið vaknar

06.11.2019

Edda Björg á að baki farsælan feril. Nú stígur hún á svið Samkomuhússins til að taka þátt í uppsetningu Leikfélags Akureyrar á verðlaunasöngleiknum Vorið vaknar í leikstjórn Mörtu Nordal.

Leikkonan landsþekkta, Edda Björg Eyjólfsdóttir, verður á meðal leikara í verðlaunasöngleiknum Vorið vaknar sem Leikfélag Akureyrar frumsýnir í byrjun næsta árs.

Vorið vaknar fjallar um fyrstu kynlífsreynslu, skólakerfið, kvíða og frelsisþrá unglinga í afturhaldssömu og þröngsýnu samfélagi 19. aldarinnar sem leyfir engin frávik frá hinu viðtekna.

Uppfærsla söngleiksins á Broadway árið 2006, hlaut átta Tony verðlaun og þar á meðal sem besti nýi söngleikurinn. Uppsetningin vann þar að auki fjölda annarra verðlauna og tilnefninga og hefur farið sigurför um heiminn allar götur síðan. Vorið vaknar er nú sett upp í fyrsta sinn í atvinnuleikhúsi á Íslandi.

Aðrir leikarar eru Þorsteinn Bachmann, Ahd Tamini, Ari Orrason, Árni Beinteinn Árnason, Bjarklind Ásta Brynjólfsdóttir, Eik Haraldsdóttir, Jónína Björt Gunnarsdóttir, Júlí Heiðar Halldórsson, Rúnar Kristinn Rúnarsson, Viktoría Sigurðardóttir og Þórdís Björk Þorfinnsdóttir. Marta Nordal leikstýrir.

Miðasala á VORIÐ VAKNAR er í fullum gangi hérna.

Til baka