Nýdönsk með sína árlegu tónleika

Hljómsveitin Nýdönsk heldur sína árlegu tónleika í Hofi, laugardaginn 27.september n.k. Þessi langlífa sveit hefur sent frá sér á annan tug hljómplatna og vinsæl lög sveitarinnar skipta tugum; Horfðu til himins, Alelda, Fram á nótt, Flugvélar og öll hin. Nýdanskir hyggjast bjóða upp á fjölbreytta tónlistarveislu sem inniheldur það vinsælasta, frumlegasta, fallegasta og síðast en ekki síst það nýjasta frá farsælum ferli. 

Hljómsveitin fór til Berlínar í marsmánuði og hljóðritaði þar fimm ný lög sem saman hafa hlotið nafnið Diskó Berlín, fyrri hluti.  Upptökur fóru fram í Austur-Berlín og undu félagarnir sér vel við tónlistarsköpun og schnitzelát. 

Þeir sem kaupa miða á tónleikana munu eignast þessi lög og texta  sér að kostnaðarlausu auk myndefnis frá upptökutímanum. 

Miðasala hefst í byrjun maí.