Stuðlar

Angurvær veröld sem var
Flygill, horn og fiðla í rómantísku samspili

Efnisskrá tónleikanna hefur rómantískt yfirbragð. Þungamiðjan er hið dramatíska horntríó Johannesar Brahms Op. 40 í Es-dúr. Einnig verður verk Eleanor Alberg No-mans land Lullaby flutt en hið alkunna Wiegenlied eða Vögguljóð eftir Brahms varð henni innblástur við gerð þess. Rómantískir fulltrúar Norðurlandanna á efnisskránni eru Daninn Carl Nielsen og Norðmaðurinn Christian Sinding.
 

Lára Sóley Jóhannsdóttir fiðluleikari er fædd á Húsavík. Að loknu námi við Menntaskólann á Akureyri og Tónlistarskólann á Akureyri hélt Lára til Bretlands þar sem hún stundaði framhaldsnám. Hún lauk prófi árið 2006 frá The Royal Welsh College of Music and Drama. Lára starfar nú sem fiðlukennari við Tónlistarskólann á Akureyri og verkefnastjóri í Menningarhúsinu Hofi. Hún kemur reglulega fram með ýmsum tónlistarhópum og stundar nám í barokk-fiðluleik.

Helgi Þorbjörn Svavarsson hornleikari er fæddur á Sauðárkróki. Helgi lauk blásarakennaraprófi frá Tónlistarskólanum í Reykjavík 1990. Að því loknu hélt hann til Noregs þar sem hann lagði stund á hornleik, hljómsveitarstjórn og skólastjórn við Norska tónlistarháskólann. Helgi starfar nú sem verkefnastjóri og ráðgjafi hjá SÍMEY og sinnir hljóðfærakennslu samhliða því starfi.

Daníel Þorsteinsson píanóleikari lauk framhaldsprófi frá Sweelinck tónlistarháskólanum í Amsterdam árið 1993. Hann hefur komið fram víða um heim og leikið tónlist af ýmsu tagi inn á fjölda hljómdiska. Daníel hefur samið og útsett tónlist fyrir leikhús, söngvara og kóra. Hann kennir við Tónlistarskólann á Akureyri og Tónlistarskóla Eyjafjarðar, starfar sem organisti og kórstjóri við Laugalandsprestakall í Eyjafirði og er stjórnandi Kvennakórs Akureyrar.