Textílfélag Íslands sýnir á Akureyri

Sýningin er í Mjólkurbúðinni, í Ketilhúsinu  og  Menningarhúsinu Hofi sem sýnir best umfang sýningarinnar sem er  opnunarsýning Listasumars á Akureyri.  Fjölbreytnin er mikil sem gefur til kynna þá miklu breidd sem þráðlistir spanna á Íslandi í dag. Á sýningunni er prjónahönnun, fatahönnun, veflistaverk, tauþrykk, þæfing, útsaumur, pappírsverk, ljósmyndaverk, ljósahönnun og margskonar óhefðbundin þráðlistaverk unnin í blandaða tækni.

Textílfélag Íslands var stofnað 1974 af nemendum og kennurum textíldeildar Myndlista- og handíðaskólans ásamt starfandi  textíllistamönnum.  Eitt af aðalmarkmiðum félagsins hefur ávallt verið að gæta hagsmuna félagsmanna sinna og kynna list þeirra á innlendum og erlendum vettvangi.

Í dag eru félagskonur 80 og þátttakendur í sumarsýningu Textílfélagsins á Akureyri eru 39 talsins eða um helmingur félagskvenna.  Það er því gleðiefni að svo fjölmennur hópur textílkvenna taki þátt í sýningunni en þetta er í fyrsta sinn sem Textílfélag Íslands sýnir norðan heiða. Segja má að það hafi verið tímabært í ljósi þess að vagga textíliðnaðar á Íslandi  var á Akureyri lungan úr 20. öldinni. 

Sýningin í Hofi stendur yfir frá 2. til 17. júlí  og er opin alla daga.