Úthlutunarreglur 2025-2028
VERÐANDI
Listsjóður – samstarfsverkefni Akureyrarbæjar, Menningarfélags Akureyrar og Menningarfélagsins Hofs
Helstu markmið verkefnisins eru að :
a) Auðvelda ungu listafólki og þeim sem standa utan stofnanna að nýta sér þá fyrirmyndar aðstöðu sem Hof og Samkomuhúsið bjóða upp á.
b) Stuðla að fjölbreytileika í listviðburðum í Hofi og Samkomuhúsinu.
c) Nýta þá möguleika sem Hof og Samkomuhúsið bjóða upp á fyrir fjölbreytta viðburði.
- Auglýsa skal eftir styrkumsóknum á fyrsta ársfjórðungi og skal afgreiðslu umsókna lokið eigi síðar en í júlí . Markmiðið er að viðburðir sem hljóta styrk geti orðið sýnilegir í menningarframboði komandi starfsárs Menningarfélags Akureyrar. Tryggja skal að auglýsingar og umfjöllun um umsóknarferlið séu áberandi og skulu m.a. birtast á heimasíðu Akureyrarbæjar og Menningarfélags Akureyrar.
Umsækjendur geta verið einstaklingar eða hópar sem hyggjast vera með listviðburð í Hofi. Að jafnaði eru tveir viðburðir styrktir sem fara fram í Hamraborg. - Umsækjendur sækja um með rafrænum hætti í gegnum mak.is. Í umsókninni skal koma fram greinargóð lýsing á verkefninu og markmiðum þess, einföld kostnaðaráætlun, ferilskrá helstu þátttakenda, óskatími til sýninga eða flutnings, ásamt ósk um staðsetningu/sal.
- Í kostnaðaráætlun umsóknar skal þess getið hvort og hvaða aðra styrki hefur verið sótt um vegna verkefnisins, ráðgert er að sækja um, eða verkefnið hefur þegar fengið, á þeim tíma sem umsóknin er gerð. Úthlutunarnefndin lítur það jákvæðum augum að verkefni hljóti einnig styrkveitingu annars staðar frá.
-
Litið verður til eftirtalinna atriða við afgreiðslu umsókna:
- Að verkefnið henti og nýti möguleika Hofs.
- Að verkefnið hafi möguleika á að höfða til nýrra áheyrenda- og áhorfendahópa.
- Að umsókn verkefnisins sýni fram á að hér sé á ferð bæði metnaðarfullt og framkvæmanlegt verkefni.
- Að verkefnið ýti undir fjölbreytt listalíf í Hofi.
- Að verkefni frá listafólki sem hafa skýra tengingu við Akureyri og nágrenni njóti alla jafna forgangs.
- Styrkur til verkefnis er ekki greiddur út en gengur til kostnaðar vegna afnota af salarkynnum, grunntæknibúnaði, tækniþjónustu og auglýsingu í skjám í og utan á Hofi. Hámarksstyrkur til hvers verkefnis við hverja úthlutun er að andvirði leigu fyrir Hamraborg ásamt lágmarkstæknibúnaði skv. verðskrá Menningarfélags Akureyrar. Umrædd styrkupphæð er hámark, en ekki endilega viðmið við styrkúthlutanir.
- Styrkþegi skal geta þess í kynningu sinni á verkefninu, þar með töldum í fréttatilkynningu, í viðtölum, á prentefni og á samfélagsmiðlum eins og mögulegt er, að verkefnið sé styrkt af sjóðnum, auk þess að hafa kennimerki sjóðsins sýnilegt þar sem það á við.
- Styrkþegi semur um tímasetningu við Menningarfélag Akureyrar. Gerður skal skriflegur samningur um styrkinn. Ágóði af viðburðinum að frádregnum kostnaði umfram styrkupphæð og miðasöluþóknun er greiddur styrkþega skv. gildandi samningi milli Menningarfélags Akureyrar og styrkþega. Sjóðurinn skal ekki hafa tekjur af neinu þeirra verkefna sem hljóta styrk og ber ekki fjárhagslega ábyrgð á verkefnum sem styrk hljóta.
- Styrkþegi skal geta þess í kynningu sinni á verkefninu, þar með talið í fréttatilkynningu, í viðtölum, á prentefni og á samfélagsmiðlum, að verkefnið sé styrkt af sjóðnum, auk þess að hafa kennimerki sjóðsins sýnilegt þar sem það á við.
- Þegar tilkynnt er um úthlutanir, skal ávallt nafngreina þá sem að sjóðnum standa: Menningarfélag Akureyrar, Akureyrarbær og Menningarfélagið Hof. Úthlutanir skulu kynntar á opinberum vettvangi.
- Úthlutunarnefnd áskilur sér rétt til að afturkalla styrkveitingu ef hún metur það sem svo að tvísýnt sé um framvindu verkefnisins, eða að ljóst þyki að ekki verði af viðburðinum.
- Úthlutunarnefndin veitir ekki rökstuðning fyrir afgreiðslu umsókna.
Akureyri 7. apríl 2025