TRIGGER WARNING

 Í sýningunni er fjallað um eða ýjað að ofbeldi, kynferðisofbeldi, kynþáttafordómum, einelti, fötlunarfordómum, sjálfsvígum og annað sem getur vakið óþægilegar og erfiðar tilfinningar hjá áhorfendum.

Aldursviðmið: 16 ára og eldri.

Sýningin er ekki ætluð börnum. 

And Björk, of course eftir Þorvald Þorsteinsson er nærgöngul og hrollvekjandi hásádeila þar sem sjálfsmynd þjóðar er lýst án miskunnar.  Verkið er í senn sprenghlægilegt, óviðeigandi og óþægilegt. Nokkrar persónur koma saman á sjálfshjálparnámskeiði undir stjórn leiðbeinanda og eru þau öll í leit að sjálfum sér og staðfestingu á eigin virði. Verkið fjallar um sjálfsmynd okkar og hinn eilífa vanmátt manneskjunnar í að mæta sjálfri sér eða taka ábyrgð á lífi sínu.

And Björk, of course var frumsýnd í Borgarleikhúsinu árið 2001 í leikstjórn Benedikst Erlingssonar og hlaut einróma lof gagnrýnenda. Í kjölfarið var gerð samnefnd kvikmynd í leikstjórn Lárusar Ýmis Óskarssonar. Verkið hefur einnig verið þýtt á erlend tungumál og var frumsýnt í Varia leikhúsinu í Brussel árið 2006.

Þorvaldur Þorsteinsson var myndlistarmaður og rithöfundur en fyrir utan leikritið And Björk of course er hann einna þekktastur fyrir barnaleikritið Skilaboðaskjóðan og bækurnar um Blíðfinn.

„Mig langaði til að skrifa leikrit um ástand. Mig var lengi búið að langa til þess en treysti mér aldrei almennilega til þess. Með ástandi á ég við leikrit án eiginlegs söguþráðar. Ekkert eiginlegt upphaf, miðja eða endir. Heldur ástand.“
Þorvaldur Þorsteinsson, Morgunblaðið 07.04 2002

Leikarar: Jón Gnarr, Sverrir Þór Sverrisson, Eygló Hilmarsdóttir, Urður Bergsdóttir, Davíð Þór Katrínarson, María Pálsdóttir og María Heba Þorkelsdóttir
Höfundur: Þorvaldur Þorsteinsson
Leikstjóri: Gréta Kristín Ómarsdóttir
Leikmynd og búningar: Brynja Björnsdóttir
Ljósahönnun: Ólafur Ágúst Stefánsson
Tónlist: Axel Ingi Árnason og Pétur Karl Heiðarson
Hljóð: Gunnar Sigurbjörnsson
Leikgervi: Harpa Birgisdóttir