Listakonan Ásta Sigurðardóttir varð „fræg á einni nóttu“ eins og títt hefur verið sagt, þegar smásaga hennar „Sunnudagskvöld til mánudagsmorguns“ kom út í tímaritinu Líf og list árið 1951. Ásta var þá 21 árs gömul. Um viðtökurnar við sögunni og skáldkonuna Ástu hefur mikið verið ritað og rætt í gegnum tíðina og óþarfi að tíunda það hér. Minna hefur farið fyrir myndlistarkonunni Ástu, en Ásta var afar hæfileikarík og fjölhæf listakona. Hún vann um tíma í leirkeraverksmiðjunni Funa þar sem hún fékkst við listskreytingar á leirkerum. Hún fékkst einnig við málaralist, teikningu og grafík, auk þess sem hún myndskreytti og hannaði spil með mögnuðum teikningum af þekktum íslenskum þjóðsagnapersónum. Henni lánaðist þó ekki að klára spilin, en þau voru gefin út í fyrsta skipti fyrir jólin 2022 af Forlaginu, fyrir tilstuðlan afkomenda hennar. Og nú hafa afkomendur hennar einnig staðið fyrir því að endurvekja dúkristur móður sinnar.

Dúkristur Ástu prýddu smásagnasafn hennar Sunnudagskvöld til mánudagsmorguns sem kom út árið 1961. Verkin eru svört í grunninn, sem kannski gerir þau drungaleg við fyrstu sýn, enda voru þau unnin til að styðja við sögur Ástu sem höfðu tragískan og myrkan undirtón. Grófleiki, hvöss og kassalaga form einkenna dúkristur Ástu, sér í lagi þegar hún teiknar karlmenn, eins og sjá má á myndum hennar við sögurnar „Sunnudagskvöld til mánudagsmorguns“ og „Gatan í rigningu“, en formin mýkjast þegar hún teiknar konur og sérstaklega börn. Má þar nefna ungu stúlkuna sem dreymdi um betra líf í „Kóngaliljum“ og börnin í „Dýrasögu“ og „Skerplu“. Smásagnasafn Ástu er afar fallegt og heildstætt listaverk sem sýnir að Ásta var ekki síðri myndlistarkona en rithöfundur og gaman að rýna í texta hennar út frá því samhengi, því oft flæðir myndmálið inn í textann og í sögum hennar má finna margar einstaklega myndrænar og kyngimagnaðar lýsingar.

Í tengslum við leiksyningu Þjóðleikhússins Afkomendur Ástu fengu til liðs við sig grafíklistamanninn Guðmund Ármann sem þrykkti 50 eintök af hverri mynd og í júní 2023 var haldin sýning á dúkristunum, ásamt nokkrum vatnslitaverkum sem varðveist hafa eftir Ástu. Sú sýning kemur nú til Akrueyrar og verður opnuð í Hofi þann 25. Janúar 2024.